ЦИПУ æмæ хæххон паддзахадон аграрон университеты бындурыл кусынц робототехникæйы

Роман Жиданов робототехникӕмӕ йе 'ргом раздæхта, скъолайы ма куы ахуыр кодта, уæд. Уыцы рæстæг сфæнд кодта ацы къабазы кæй архайдзæн, уый. Ныртӕккӕ лӕппу у Хæххон паддзахадон аграрон университеты дыккæгæм курсы студент. Ахуыр кæны парахат здӕхт – æнæпилотон системӕты бакуыст ӕмӕ разамынд. Практикӕ алы бон дӕр. Дыууӕ-ӕртӕ парæйы ӕмбырд кӕнынц ӕнӕпилотон системæтæ, программӕтӕ сын аразынц ӕмӕ кусынц разамынд дӕттыны сусæгдзинæдтыл. Техникон цӕттӕдзинадӕй æххæст сты. Студенттӕ уыцы-иу рӕстӕг ахуыр кӕнынц цалдӕр профилон дисциплинӕйы. Ахуыры хатдзæгтæм гӕсгӕ та рауагъдонтӕ исынц ӕнӕпилотон авиацион системӕты операторы квалификаци. Университеты агургӕ специалисттӕ бацӕттӕ кӕнынæн сарӕзтой нырыккон наукон-иртасӕн лабораторитӕ. Ам студенттӕ æрмæст чингуытӕй нӕ ахуыр кӕнынц, фӕлӕ ма кусынц ногдӕр технологитимӕ дӕр. Уыимӕ ӕргом здахынц робототехникӕ ӕмӕ ӕнӕпилотон системӕтӕй сабыр царды пайда кӕнынмӕ. Парахат къабӕзты 'хсӕн хъӕууон хӕдзарад ӕмӕ æрмæст уый нӕ. Ам ма аразынц тематикон мадзӕлттӕ, технологон фембӕлдтытӕ ӕмӕ профориентацион проекттӕ, фӕсивӕдӕн ӕххуыс кӕнынц сӕ фидӕны дӕсныйад сбӕрӕг кӕнынӕн. Ӕдæппæтæй ЦИПУ æмæ Хæххон паддзахадон аграрон университеты бындурыл цӕттӕгӕнӕн центрты сахуыр кодтой 500 студенты онг. Бирӕтӕн дзы робототехникӕимӕ базонгӕ уӕвын нысан кæны фидæны дæсныйадмæ фыццаг къахдзæф акæнын, абон экономикӕйы парахат къабӕзтӕ чи ивы, уыдонмæ. Алина Гостева, Челæхсаты Алан